席地而瞓 之 天然床

話說你哋鍾唔鍾意行山、野餐呢?香港冬天春天呢啲季節唔太凍,又成日有陽光,小編我就最鍾意去啲大草地,鋪張野餐墊,曬日光浴。有時想多啲運動量,仲會去行山。上到最高頂之後,搵個靚位,席地而「瞓」!其實只要身體力行,就會搵到好多天賜嘅「天然床」,除咗可以喺行山時稍作歇息之外,仲可以遠離市區人群,吸多啲新鮮空氣,人都精神啲!不過記得無論行山定野餐,都要自備垃圾袋,唔好隨便扔垃圾喺郊外。而且我哋介紹嘅「天然床」位置有機會要攀上爬落,大家記得要量力而為,留意附近警告標誌並遵守有關告示,因應實際情況同自己身體狀況而衡量危險性。

今次我哋去嘅就係望夫石!相傳有對夫妻,漁民老公出海謀生搵飯食,但遲遲都冇返屋企,下落不明,於是老婆就抱住個仔每日行上山頂望吓老公幾時返。有日行雷閃電都照舊行上去,結果被雷劈中變咗舊大石,就係我哋見到嘅望夫石啦!

去望夫石嘅路程算係易行,由紅梅谷燒烤場開始登山,沿紅梅谷自然教育徑向上行,直至見到引水道就過對面,繼續沿獅紅古道嘅梯級行上山。去到有個分叉位會見到指示牌寫住,向左邊行會到獅子山,向右行就會到望夫石,咁我哋就向右行多7-10分鐘就去到我哋嘅「天然床」喇!

上到望夫石隔離,慶幸當日天色好清澈,大圍同顯徑嘅景色一覽無遺。而我哋介紹嘅「天然床」位置就喺行入望夫石嘅右邊,有舊大石嘅弧度啱啱好fit到好似我哋平時坐梳化咁hea嘅姿勢!呢個位前後都有啲樹蔭,正好遮吓蔭、擋吓當日嘅猛烈太陽。不過渣渣輝當日試瞓,就覺得前面樹叢會擋住咗望出大圍嘅景色,稍微扣少少分。仲有提提大家,如果要瞓喺大石上,就唔好學渣渣輝著白色衫喇。一瞓落去啲千年灰塵同沙土都一併痴曬上件淺色衫就慘啦!

——————

望夫石 天然石床 評測 by 渣渣輝(滿分為🌕🌕🌕🌕🌕)

景觀:🌕🌕🌗
當日個天係幾靚幾藍嘅,不過側邊啲景都係俾啲樹擋曬。作為天然床,佢都算真係叫你要合埋眼瞓教嘅床。
抵達難度:🌕🌕🌕🌗
之前要行一段山先到,雖然條路唔算難行。但係到咗望夫石後,要跨一跨過舊石先到達,都難難地架。
好瞓指數:🌕🌕🌕🌗
軟硬度就一定一般架啦,不過正嘅係有個curve位,都幾fit個背脊嘅~而且嗰個位又唔算大風,冬天去都唔算好凍,都幾正。
整體分數:🌕🌕🌕
其實今次搵到嘅天然床算係咁㗎喇,有人體工學,又唔算好難到達。不過係個景真係大打折扣,除左個天,基本上乜都睇唔到,so sad~

——————

當日小編們喺望夫石抖夠瞓夠之後,就原路行返去分叉位,行指向獅子山嘅方向上山。雖然上到獅子山嗰度冇天然床,但係望番落去樂富、九龍塘景觀都好開揚,值得一去㗎!

大家繼續期待吓下一輯嘅【 席地而瞓 之 天然床 】!將會帶大家去更多瞓覺好去處!

文:小編tt、渣渣輝

——————

#WannaPlay躍出去 #WannaPlayHK #WannaPlay
#WannaPlay_天然床 #席地而瞓之天然床 #天然床 #大地之母 #望夫石 #獅子山 #紅梅谷 #香港 #hongkong #行山 #郊野 #郊遊 #野外