屏南石澗瞓到爽🤤 龜頭山嶺咪亂闖⚠️

話說前嗰排小編同一班Wannaplay高層去咗行龜頭嶺,途中俾我地發現絕世靚床!由南涌公廁落車,行入南涌郊遊徑,大約一個鐘左右就到達屏南石澗嘅交匯處。今次嘅床位就正正位於石澗隔離嘅一個凹位!🤤

📌 屏南石澗天然床 (渣渣評分)

🔸景觀:🌕🌕🌕
床嘅正前方就係屏南石澗🗿💦,可以望到流水同水池,上望就係藍天白雲,左右則有樹蔭,輕鬆又寫意。不過小編自已就略嫌唔夠開揚,如果你係鍾意少少樹、有條澗嘅話,或者會更享受呢到嘅景觀。

🔹抵達難度:🌕🌕🌕
由南涌郊遊徑出發,慢慢行到過嚟只需約一小時。途中樓梯數量唔多,又唔太斜,相對其他山上嘅床來講算係容易抵達。

🔸好瞓指數:🌕🌕🌕🌕
石床始終較硬,不過因著中間嘅cruve位,個人攤落去時腰部得到承托,而且隔離嘅流水聲有助放鬆身心。但留意舊石有啲硬🪨,攝唔到隻手做枕頭。出發前建議帶同毛巾或吹氣枕頭,咁就真係perfect喇!

🔹整體分數:🌕🌕🌕🌗
整體嚟講,呢張床都幾舒服。四圍有山水相伴,微風送爽。不過因為呢到屬於南涌郊遊徑必經之路,即使並非熱門路線,瞓瞓吓都不時有人行過。另外,呢到景色未算開揚,屬於座山較低嘅位置。如果你想好chill咁感受大自然嘅壯麗就差少少喇。不過如果你鍾情於山澗+大石+樹蔭,呢到就係你嘅天堂!

📌 後續:

當日小編俾人催👺,攤咗無幾耐就要走。之後一路沿住南涌郊遊徑直上龜頭嶺。其實嗰到無一條完整嘅路上去,攻頂需經過一段要求手腳並用、接近70度嘅斜路。小編有畏高,一路上完全無心理空間停低影相,望轉頭更感受到由高度及斜度形成嘅恐懼深淵😰。即使最終到達標高柱,落山嘅路又係斜到無輪,彷彿係懸崖游走。小編全程戰戰兢兢,行到懷疑人生!🤢好在最尾無跌死,出得翻嚟咋。🤮

📌 ⚠️注意事項⚠️ + 點去?🚘

喺粉嶺港鐵站坐小巴56k,於南涌公廁落車。落車後沿大路走至南涌郊遊徑,一路行到尾。如果途中想上龜頭嶺,要根據地圖,過左一半路程後右轉入樹林再往上行。不過小編絕對唔建議新手、且喺缺乏行山鞋嘅情況下登頂!否則跣死無命賠啊!💀

文:小編渣渣
參與:Wannaplay高層(成班行山渣渣)