行山行到半路攰點算? 咪瞓醒先再行囉

大東山近年成為咗港人嘅熱門行山地點之一。雖然山路比較長,但難度唔算高,只要你體能fit 少少都可以完成。不過如果你行行吓真係攰攰地,加埋香港精神就係無精神,咁又點算呢?

唔知係咪經歷過颱風山竹之後,山頭有啲塌樹。喺前往大東山嘅路上有兩張十分新淨嘅長櫈,櫈嘅前方面向大海,左邊係繼續上山嘅路程,而右邊就前往觀景台。小編去嘅當日萬里無雲,一瞓上張櫈到,成個天都係藍色,非常震撼,真係好似俾個天包圍住自己咁。偶爾坐起身行前兩步就可以俯瞰海景。(不過我畏高,唔係好夠膽睇...🙈)瞓喺度真係好有同大自然get in touch嘅感覺。唯一係呢到風比較大,而且因為水土流失,地面會比較多沙石。所以呢度晏少少就會凍同埋漾起啲沙石,真係食曬塵啊!

山之天然床 由渣渣輝評測 (滿分為🌕🌕🌕🌕🌕)

🔸景觀:🌕🌕🌕🌕
景觀開闊,一開眼就係藍天,前望俯瞰大海,左望右望就係山景,仲想點?
🔹抵達難度:🌕🌕🌕🌗
上到嗰個位其實都少攰,前面有一段路要行,開頭仲會有一段長樓梯。不過為咗瞓個靚覺,你可以去到幾盡?
🔸好瞓指數:🌕🌕🌗
好瞓就一般㗎啦,始終張櫈唔闊,仲係硬身添。不過環境都可以令到個心定落來,慢慢瞓得著。
🔹整體分數:🌕🌕🌕🌕
靚景就係一切,係難行少少,張床係硬少少。不過天地為被同床嘅地方,喺香港真係唔多。Well,夫復何求呢?

路線參考:

由東浦坐11或23號巴士至伯公坳,沿鳳凰徑而行,一路上大東山中間就會見到。