喺摩星嶺草地曬住日光浴瞓晏覺

祝大家農曆新年快樂!🎊🧧覺得喺香港想搵個又靜又少人嘅地方,低消費地休閑過一日好難?小編搵到個好去處 — 就係摩星嶺配水庫臨時花園啦!

小編搭1號城巴,喺總站 - 摩星嶺落車。落車之後行返轉頭三、四步,就會見到有條向上行嘅分叉路,落足眼力睇就見到綠叢中嘅路牌「摩星嶺徑」。沿路直行上山,途中會見到個分叉路口,我哋行右邊條小路繼續上就啱啦。全程行大概十五分鐘。

上到咗配水庫花園真係好靜,背山面海,只有間唔中一、兩個居民跑步,同埋巡邏看更喺附近,而且地方好大,又唔洗同人坐得好近野餐,感覺Relax咗好多。不過呢到啲草唔青綠,偏枯黃同禿。仲要小心揀好野餐位置,以免瞓正喺狗仔便便同石頭上面。小編同友人揀咗個靚位,食咗個午餐之後就瞓低睇書、聽音樂、瞓晏覺。最後日落前沿路落返山,搭巴士翻返市區。

天然草地床 由小編tt評測 (滿分為🌕🌕🌕🌕🌕)

🔸景觀:🌕🌕🌕🌖
背山面海,坐到攰行前啲就見到沙灣海同半山住宅屋頂,有居高臨下之感。不過唔好彩周圍有「地雷」,都幾影響視覺、嗅覺感受㗎!
🔹抵達難度:🌕🌕🌕
雖然都係石屎路 + 十五分鐘路程,但就難在一直上斜,小編途中都行到喘晒氣,抖咗兩、三次,所以建議大家輕便行裝出發,量力而為。
🔸好瞓指數:🌕🌕🌕🌕🌗
小編去當日係好好天,曬住太陽瞓口水都流埋出嚟。仲要又靜、又唔大風、又暖,相信你哋去到都一樣咁好瞓~
🔹整體分數:🌕🌕🌕🌕