從線上走到線下的MEME展

近年meme喺網絡世界大行其道,各式各樣嘅meme圖不斷湧現喺社交平台。Meme作為影響流行文化嘅一員,由次文化逐漸走向大眾。今次展覽將各種meme圖由網上搬到線下,以氣味、AR、影像等媒介將meme實體化呈現。

Meme具備咗有趣同喺網絡上廣泛傳播嘅特質。可能你我都好難想像Meme會成為展覽嘅主角,然而meme絕對係藝術。一個招牌動作,一個經典表情,一句啜核對白,經過網民大量複製,加以改圖/二創,一張張潛力meme就此誕生。

走入紅色霓虹燈映照嘅meme時光隧道,旁邊嘅iMac不斷模擬一張meme圖嘅製作過程,顯示由六十年代至今嘅流行meme圖,帶領觀眾走入自動化嘅未來meme工廠。展場內沿牆壁迴轉嘅輸送帶,不間斷地展示78幅大熱meme圖。「我覺得自己是零」、「唔好啦」、姜濤喺「叱咤頒獎禮」攞獎嘅驚訝樣等meme圖重新繪畫,一一呈現喺觀眾眼前。

佔據展場中央位置嘅輸送帶放置咗一系列meme互動裝置。觀眾可以透過iPad掃描AR meme圖,產生立體影像/GIF圖,亦可以一嚐「你個嘢壞咗啊」、「食屎啦你」同「壞過凱婷」嘅獨特氣味。觀眾站在兩個不停運轉嘅輸送帶旁邊,接收龐大嘅資訊量,恍似將我哋平日瀏覽社交網站嘅情況具象化地呈現。看似被動觀展嘅人,然而卻係傳播meme嘅重要推手。

以使用者自創內容為主嘅meme,內容大致離不開諷刺時弊、無厘頭、自嘲等等。不少meme專頁更係針對特定目標受眾而設,目標受眾因為自身經歷對meme產生共嗚,以meme會友,互相團爐取暖。Meme由次文化走向主流,又會如何衝擊藝術市場發展?

MEME MUSEUM by 9GAG實體展
日期:即日至 2021 年 9 月 5 日
時間:12:00pm – 10:00pm
地點:chi K11 藝術空間(K11 Art Mall 地庫 2 樓)

文:小編文青