擺脫視覺主導,重拾五感到心靈感知體驗嘅展覽

今次小編去喺香港藝術中心(Hong Kong Art Center)五樓包氏畫廊嘅媒體藝術展覽 — Cinema 2.0: Counter Visions 超眼球。展覽免費入場,開放至3月14號咋,記得捉緊展覽期嘅尾巴去睇啦。

五樓𨋢門一開,直望第一件展品就係《πTon/2》(瑞士)。一開始唔知係乜嘢嚟,驟眼睇好似一條蟲型膠管。直至工作人員啟動咗電源,嗰一刻,小編企喺「蟲」嘅隔離,眼見佢不規則、無法預測、劇烈咁蠕動,每一下都伴隨住80、90年代科幻恐怖電影裡面詭異嘅電子金屬聲,真係嚇左一跳。「蟲」由一開始只係移動身體嘅一小部分,到之後大幅度地扭動、抽搐,甚至突然接近小編嘅腳邊,的確會令人感到少少驚恐。有趣嘅係,雖然前方其實只係一條膠管,但一路睇,腦海不禁浮現電影 - 《異形》嘅畫面。唔知係咪小編鍾意睇科幻恐怖電影嘅緣故,心情由少少驚慌慢慢轉為興奮,甚至想走入「蟲堆」之中,彷彿好似異形女主角征服異形皇后一樣。不過喺呢個大膽嘅想法得到實行之前,聲音慢慢歸於平靜,地上嘅「蟲」又變翻做膠管。而我就好似睇左一場簡短又精彩嘅科幻恐怖電影一樣,帶著刺激感去下個展品。

另一件展品《Algorithmic Perfumery》(荷蘭)則係人工智能系統配合嗅覺嘅體驗。小編先即場用幾分鐘填咗份網上問卷,裡面有問居住城市、性別、年齡、最能代表自己嘅顏色、性格(例如:Follower vs Leader, Realist vs Dreamer)等問題,最後人工智能系統會根據答案即場調配三款香水送俾返小編,仲有得睇返每道香水嘅配方做參考。個人覺得三款香水裡面,都有兩款幾啱心水,日後真係可以攞嚟用。而呢部香水調配機器都大有來頭,成部機器同系統程式都係呢位荷蘭藝術家Frederik Duerinck親自製造,由荷蘭完整地運過嚟香港!而且係呢個展品附近,不停彌漫着唔同嘅香水味,對習慣於睇視覺藝術嘅小編嚟講,呢種嗅覺上體驗都好特別!

除咗以上講嘅呢兩個展品之外,場內仲有要求合埋眼感受嘅展品體驗,小編喺呢到就唔劇透咁多,鼓勵返大家親身去睇展覽,正確嚟講,係去感受展覽帶俾大家嘅「超眼球」體驗。

文:小編tt、渣渣輝
——————
Cinema 2.0: Counter Visions 超眼球
香港藝術中心 Hong Kong Art Center:5樓包氏畫廊 5/F Pao Galleries
2021年3月2號至3月14號
中午12點至晚上8點