從身外之物創造出我哋嘅生活寫照

Cinema 2.0: Counter Visions 超眼球同場仲有今屆ifva比賽媒體藝術組入圍作品展㗎,裏面展出咗十份來自本地及亞洲不同地區嘅媒體藝術作品,透過各種媒介去質問我哋對世界嘅認知。

牆上嘅展品《刪不了的符號 II》不間斷咁呈現被刪除嘅聲音。本地藝術家孫詠怡透過港大研究團隊嘅微博鏡(Weiboscope)系統,每日收集喺微博上被審查/刪除嘅評論同推文,當中包括 emoji、符號、中文同英文字詞。作品將網絡上被刪除嘅聲音逐字解構,以格框編排,填滿整個畫面。每個推文出現嘅時間長短,亦相等於佢喺微博上可以被瀏覽嘅時間。

望住白牆上面投射住密密麻麻「被消失」嘅文字,不禁令小編反思審查制度喺不同嘅體制同科技平台上,為我哋帶嚟嘅影響。隨住時間流逝,被消失嘅聲音喺牆上越嚟越少,數碼威權主義下活生生嘅審查制度,係我哋嘅寫照抑或係殘酷嘅預告?

5樓展場角落嘅展品《拼圖 I》以光影訴說昔日嘅香港故事。作品運用塑膠製品組合成旋轉發光雕塑,將物件嘅輪廓投射喺牆上面。本地藝術家阮家儀將佢對變化急速嘅香港嘅想像,透過光影留住從前各個黃金時代嘅象徵。牆上面紅綠色嘅燈光,看似係兩種極端,互不協調,但又同變化莫測嘅香港景色相映成趣。

入圍作品展仲有其他展品,透過眼睛、身體、植物等媒介去開拓我哋對感知嘅想像,全部都值得慢慢感受㗎,趁最後呢個星期親身去體驗下啦!

文:小編文青
——————
第二十六屆ifva獨立短片及影像媒體比賽
媒體藝術組入圍作品展

香港藝術中心 Hong Kong Art Center:
5樓包氏畫廊 5/F Pao Galleries
2021年3月2號至3月14號
中午12點至晚上8點
免費入場