「2020世界新聞攝影展」:苦難係咪全世界嘅共通語言?

📌苦難作為共通語言,有咩意義?
每年新聞展都會展示上一年嚟自世界各地唔同攝影師或記者嘅頂級攝影作品。呢啲作品令我地穿越時空地域,瞭解到世界各地唔同嘅面向。一路睇不禁令人覺得:或者苦難真係人類嘅共通語言。但呢種看似難過嘅共通語言,然而又帶嚟安慰、力量同希望。

📌新聞展簡介
世界新聞攝影展嚟到第63屆,展出咗嚟自125個國家、4,282個攝影師所交出嘅73,996張參賽作品入面突圍而出嘅相片。呢個展覽嘅評審由唔同國家、種族嘅業內人士組成,而且獨立於展覽機構。佢地根據準確度、公平原則同其中嘅洞察力作評審,最終挑選出一系列嘅作品。當中頭幾位嘅作品就係呢到展出。

由於相片眾多,我哋揀咗3張小編最有共鳴嘅相同大家分享。

📌 哀傷與希望
第一張相嘅相中人係一位有墮胎經歷嘅白俄羅斯女士。雖然白俄羅斯嘅墮胎政策寬鬆,但墮胎對當地人嚟講仍然係一種禁忌。呢位女士年幼時失去雙腿,到佢年青懷孕嘅時候,家人就厭棄佢係一個殘廢嘅媳婦,促使佢墮胎。呢件事成為咗佢最大嘅秘密。相中佢身後有柔和嘅陽光透入室內,而佢就安坐係相嘅中間、較陰暗嘅位置,帶出一種劫後餘生嘅感覺。的確,相中嘅女士被陰影遮蔽咗部份嘅輪廓,但同時陽光亦照入屋內,勾畫出柔和嘅身影。睇呢幅相嘅時候,心中哀傷同希望並存,軟弱得嚟又多一份實感。

📌 迷失與堅定
相中15歲嘅女子為亞美尼亞嘅一位難民,她曾因「放棄生存症候群」而陷入昏迷。呢個情緒相關疾病多數出現喺漫長嘅庇護生活之中。相片以黑白色組成,髮絲部分令小編有滄桑嘅感覺。少女坐喺輪椅上,眼神帶點迷失。但係當夾埋搭喺佢身上嘅手一次過睇嘅時候,少女嘅眼神變得堅定。有趣嘅係即使佢流離失所,喺佢重遇屋企人之後,「放棄生存症候群」就再冇困擾住佢喇。

📌 黑暗與光明
呢張相攝於蘇丹嘅一次示威之中,當地政府以停電(black out)嘅策略嚟阻止人民就結束獨裁統治而示威。相中少年當時唱緊同示威相關嘅歌曲,而身邊嘅人則喺black out之下開住手機燈,有意無意間照亮青年嘅身驅。眾人嘅眼神有快樂、有流離、有無奈、有迷惑,而青年喺相中顯示堅定。佢嘅手放喺左胸之上,令人感受到真誠。Black out令青年喺手機燈下變得耀眼,呢份耀眼又帶來希望與堅定。

📌苦樂共生?
Wannaplay作為重視玩樂嘅一員,好似講咗啲好沉重嘅話題。然而,重視玩樂、細味生活、連繫社群,三者夾埋一齊先係一種完整嘅快樂。快樂不只係情緒,而係對自己及他人真誠,係一種仔細感受自己感覺,並連結於社群之中嘅快樂,而非抽離一切嘅獨樂樂。

活於現在,世界新聞攝影展嘅相同令我地嘅經歷產生共鳴;以相為鏡,令人明白自己當下嘅感受,而又因相中人嘅苦難出乎意料地同我地相似,因而有種因同苦而連結嘅感覺。

雖然世界新聞攝影實體展今日就完結,但大家仲可以喺網上睇黑白嘅PDF介紹!如有興趣,可以dm我地索取網站連結。

文:小編渣渣、文青