Next Station - Prince Edward

📌太子 - 我細細個就俾呢個名fake到啦!

細細個聽到太子呢個名,第一下就會將佢解讀做一個地方名。偶然仔細理解呢個名嘅意思,先突然意識到:噫喂!太子係講緊皇帝個仔喎。再睇翻英文 — PrinceEdward 。喂喂喂,明明人地係叫愛德華王子 喎,咁有型點會係地方名呀?

原來,太子呢個地方名嘅由來,係因為愛德華王子喺1922年去過旺角警署隔離嘅一條主要道路,後來條路就改咗名做太子道 。再後來,因為地鐵開通時,又叫咗個站做太子站 ,約定俗成之下就叫咗做太子。其實佢本來係屬於旺角嘅一部分嚟㗎!

📌 又熟悉又痛苦嘅太子

或者而家講太子,我哋已經多咗啲未必係我哋想要嘅回憶。不過如果你願意仔細啲去理解太子,佢仍然係一個好「香港」嘅地方。太子係香港嘅市中心,係荃灣線同觀塘線最多人用嘅一個轉車站。每日一到放工時間站內都非常多人,有時要等2-3班車先上到車;地面情況都一樣,一到夏天,嗰份又熱又迫,但又好「香港」嘅「燥」意都會忍唔住出現。

太子除咗令人感受到人滿為患嘅香港之外,喺呢到工作嘅人更加「香港」。根據2016年嘅人口普查數據,太子工作人口約為兩萬人,而佢地嘅每週工時中位數卻高達46小時!仲高過全港嘅中位數 - 45小時(而45小時已經係全球最高每週工作時數中位數......)。最驚訝嘅係,咁高嘅工作時數,換嚟嘅只係得中位數$12,480嘅收入。你話太子係咪真係好「香港」呢?

📌 邊鬼個會鍾意太子

其實太子,對好多人嚟講或許只係一個中轉站,一個無可避免、一啲都唔可愛、只想盡快離開嘅地方。即使係長期喺到工作、生活嘅人,或許都只係搵啖飯食呢?香港由轉口港開始、經歷內地難民潮,好多人曾經只當香港係一個做中轉生意、暫時落腳嘅地方,搵到錢就翻鄉下。到幾年後真係有人落地生根,視之為家,嚟到2021年卻又好似無奈地要離開。留低嘅人好似都只係努力地求生存,喺無力嘅生活下,只能擁抱「娛樂至死」,建設「美麗新香港」。

不過講到咁誇張,又係咪真係咁呢?真正喺太子入面生活嘅人又點諗呢?無選擇搬區,如果唔係被迫,太子係咪都有佢吸引人嘅一面、有一啲外人睇唔到嘅價值呢?

雖然社區小隊成員都只係區外人,但嚟緊就即管走入太子,一齊尋找以上問題嘅答案。或者當一個地方,仍然有人選擇留低時,必然有佢一份不可磨滅嘅價值。可能太子,都係好正㗎!

所以大家記得密切留意逢星期二晚嘅社區小隊post啦!我哋會繼續同大家尋幽探秘,發掘社區趣味!下星期二見!Peace Out!😎