黃大仙 香港嘅內陸 市民的無聊空想地帶

📌 香港嘅內陸 - 黃大仙

黃大仙,一聽呢個名你係咪就諗每年農歷新年,電視台就會報導啲善信去求籤呢。仲要年年都有人幫香港求支壞籤,都唔知係有雞先定有蛋先。的確,黃大仙嘅黃大仙廟係區內有名嘅勝地。佢不但係好多旅客會專登嚟參觀嘅地方,更加係香港唯一可以舉行道教婚禮嘅地方。

不過除此而外,小編翻查資料時,發覺黃大仙嘅一個fun fact:黃大仙竟然係香港唯一嘅內陸地區!大家都知香港係一個港,以18區嚟劃分,黃大仙區係唯一一個無海旁嘅地方。所以下次約人去黃大仙就唔好同人講食完飯去海旁坐吓啦。

📌 黃大仙 - 區內人創造力的巡禮

社小嘅隊員,當日一落車就打算去大名鼎鼎嘅黃大仙廟一探究竟,不過我哋就行錯咗路,反而發現黃大仙原來驚喜處處!

第一下吸引我哋嘅就係鳳德公園。離遠睇已經見到呢到有枝金剛棒放於一個噴水池嘅中間。呢個係一個以西遊記作主題嘅公園,裡面唔同設施都以西遊記嘅地名來命名,例如你見有金剛棒嘅地方就係水晶宮。至於有隻雀仔企喺上面嘅桶狀建築又叫咩名呢?大家不妨估下,我哋下個post開估!

再行,終於嚟到原定目的地黃大仙廟。其實一入去就已經feel到呢到嘅奢華,不但近入口處有長期開住都無所謂嘅大型電子屏幕,而且呢到處處仲係金碧輝煌。相比起鳳德公園,呢到嘅裝潢簡直係佢嘅升升升升升級版,連石梯旁都有龍同元寶嘅石雕作裝飾。不過當日我哋喺廟內最令人覺得入咗個皇宮嘅唔係啲死物,而係真係俾人當神咁拜!嚟緊會再同大家分享。

最後臨走前,我哋而見到就嚟要拆嘅竹園聯合村寮屋區。呢到無剛才嘅奢華,展現嘅更似一種務實嘅創造力:水桶加上麻繩就成為一間鋪頭收銀機、竹枝加索帶就成為晾衫架、窗前加枝橫樑搭上帆布就成為窗簾......處處都係實務生活嘅創造力。

📌 生活的活力

如果大家最近生活都覺得有啲無力,不妨嚟黃大仙四圍行吓,唔難留意到前人留落嚟創意嘅痕跡。或者佢未必係最美觀,不過喺每日都變得咁快嘅香港,有時睇返有咩喺變化中留得低都相當重要。嚟緊社小會同大家遊走黃大仙不同角落,敬請留意啦!

文:渣渣
社區研究:渣渣、Mann、爬爬
校對:墨狗
攝影:渣渣、文青
圖像設計:文青