西環邨 一個見證香港意識形態轉變嘅地方

📌西環邨作為一種昔日意識形態嘅見證

如果每幢 #公屋 都係一種時代嘅見證,西環邨所見證嘅正正就係昔日香港人對住屋質素嘅重視。西環邨建於1958-1959年,屬於屋邨建設委員會旗下嘅屋邨。屋建會於1954年成立,做嘅卻係一件現今睇嚟非常古怪嘅事:為當時嘅中產階層建造有質素且價格相宜嘅住所。相對於連基層人士都難以入住舊式公屋嘅今日,西環邨所見證嘅係一個同現今意識形態截然不同嘅時代。

📌親歷其景 - 西環邨係一條點嘅邨?

當日一到達西環邨,小編就俾佢嘅樓梯設計所吸引:「之」字型嘅樓梯,上下互相對稱,行入去時好似有一種偷望對面街嘅感覺。不過樓梯某啲位置好似有啲異味,未知係咪屬於人嘅生活痕跡。

拾級而上,可以發現西環邨都係依山而建,一排排整齊嘅單位呈現眼前。幾令我訝異嘅係竟然唔需要經過任何鐵閘,我哋就已經一次又一次咁經過唔同單位嘅門口,有啲門口位置更係喺樓梯隔離。不過相比起之前喺太子舊樓同陌生人只有一門之隔、唔知邊個喺出面嘅感覺,呢到嘅居民更似見怪不怪,只係偶爾望望我呢個拎住大大部相機嘅外人。

其實西環邨整體感覺通爽開揚,唔似舊式屋邨有一啲又長又暗嘅走廊,呢到更多俾人一種舒爽嘅感覺。

📌撞上保安 - 憤怒與人性化的對疊

行到咁上下,小編都有預感差唔多會俾保安趕。殊不知轉個頭就有保安姐姐大叫話唔俾影相,內心即時有千萬個不忿:如果係以私隱為由,咁點解之前有歌手進入屋邨大量拍攝公屋單位外嘅畫面又可以呢?話我哋騷擾的話,我哋都不過係靜靜哋影吓相,又無大吵大鬧,點解要趕我哋走呢?

呢啲說話我都無講出口,只係求其應咗句:「走㗎啦!走㗎啦!」,然後帶住一肚氣離開。幾日後再度整理當時嘅相,不禁諗翻起呢個片段。不過,當我望住西環邨一個又一個單位、令人感到親切嘅走廊,我諗起舊式港劇入面傳統刻苦耐勞嘅家庭:爸爸外出工作,媽媽做家務,仔女們喺屋企跑跑跳跳。然後我諗到嗰個保安姐姐背後有一個家庭,我自己又有珍惜嘅人,或者我同佢都只不過係咁啱帶住一個特定身份,無獨有偶地喺西環邨相遇。除此以外,佢可能係一位有好多朋友嘅女士,閒時會三五成群去飲茶;而我亦係一個好鍾意打機嘅年輕人,平時會為咗同朋友打機4、5點都唔瞓。呢一刻,道氣雖然未消晒,但內心好似意識到其實我同佢都係一個完整嘅人,一個實實在在、有種種生活經驗嘅人。呢個只係兩個完整嘅人喺特定時間相遇嘅一刻。

諗到呢到,西環邨嗰份開揚、舒適又帶點溫暖嘅感覺,再一次佔據我嘅心頭。或者有時我哋只需要將人當作「人」嚟看待,將自己當作「人」嚟看待。