葵青區 - 葵芳邨

社區小隊最後一站嚟到葵芳邨。其實同一日去晒咁多個地方,堅係有啲攰。不過既然社區小隊嘅小編們決定停低喺到嘅話,咁咪又睇吓佢地有咩噏吓囉~

「嚟到葵芳邨,係今日行程入面最後嘅目的地。呢到同葵盛西邨好唔同:雖然啲遊樂設施都係封起哂,而且同樣係公共屋邨之一,但葵芳邨相對下絕對比西邨更有生氣。葵芳邨鄰近港鐵站,平時都有唔少人經過。當日去嘅時候接近夜晚,人唔算好多,但人流卻未曾斷絕。沿路行嗰時,發現其實葵芳邨每棟樓都起得相對比較高,隔離又有一個三層停車場,相信一入葵芳邨就已經喺不知不覺間俾人海包圍。行近地鐵站,沿路有啲較大型嘅畫作,睇個畫風都係啲小朋友嘅畫。不過大家都心知肚明㗎啦,其實咪又係家長同老師嘅心機!」
渣渣輝

哇!你個渣渣,咁睇唔起小朋友?唔俾人地真係咁叻嘅!小編Mann唔該同我為呢條邨講翻啲公道說話。

「置身葵芳邨裏面,抬頭一睇,忽然發現自己俾林立嘅樓宇包圍住。無辦法啦,香港咁多人,啲樓係要起得密啲。喺一棟棟嘅樓之間,有條突兀嘅長蛇出現,硬生生咁將啲樓分成兩邊。點解咁奇怪呢?原來佢係一條有隔音嘅地鐵鐵路。佢嘅存在就一定唔太美觀㗎喇,而且隔咗音都仍然有一定嘅嘈音,對於住得咁近嘅居民嚟講,唔多唔少都有啲困擾。但係有趣嘅係,呢條路軌竟然漸漸融咗喺條邨入面,變成一個俾附近居民嘅有蓋休憩處:裏面有附近小學學生嘅畫作、有郵筒、有坐喺度hea 吓嘅伯伯、有喺度打羽毛球嘅親子……我估當初呢條路軌係唔受邨內居民歡迎嘅,但日子過下過下,佢不知不覺就成為咗條邨嘅一份子,身邊充滿居民日常生活嘅影子。」
Mann

哦⋯其實遠睇真係唔知條毛毛蟲原來係路軌。係樣衰啲,不過唔緊要,最緊要係大家漸漸習慣咗佢喺度,交通仲方便咗添!

「同一個社區,同一樣嘅景色,唔相同嘅人,會睇到唔同嘅畫面:渣渣眼中嘅社區好熱鬧,有好多人喺佢身邊行過,沿路見到小朋友嘅畫作,隱約感受到居民喺社區留低嘅足跡。而Mann著眼居民喺社區入面嘅生活,雖然鐵路橫跨成條邨,好似好礙眼,但係人照樣生活,喺下面抖吓,畫吓畫,打吓波,時間一日一日咁過,最後成為埋裏面嘅一份子。睇完兩位小編嘅文字同圖片,發現到每個社區獨特嘅面貌,其實都係由人同社區嘅互動建構而成。」
爬爬 閱

好啦,多謝爬爬精彩總結 (你條友吹嚟吹去又係俾埋曬呢啲行貨!!) 下次我地社區小隊會去另一個新地方,繼續同大家細味生活!敬請期待啦 !