葵青區 - 葵芳街市上蓋

今次社區小隊來到葵芳一帶,行行下就去到街市。正當諗住一野上埋去嘅時候,竟然俾我地發現左街市上蓋嘅隱世hea點!我地一班小編緊係上去睇下啦!

「嚟到葵芳街市嘅上蓋,映入眼簾嘅係一個大涼亭。由於時為假日,好多工人姐姐都席地而坐,談天說地,分享零食。同其他工人姐姐嘅聚集點唔同,呢到鮮有閒人。空間之大,即使人多都唔覺嘈吵。涼亭隔離有公廁,偶然見到幾個清潔工人喺到休息,好似證明咗呢到係城市中少有嘅休憩地點。行到盡頭,隔離係一間教堂,教堂外有簡單嘅佈置。不過角度所限,唔知係咪為剛過去嘅聖誕增添節日氣氛呢?筆者喺到逗留咗半個鐘,不禁為呢個難得嘅空間感到少許嘅焦慮。好似一旦多人知道呢個地方,就會破壞咗呢個小天地。然而,筆者走嘅時候留意到橫椅加咗啲無意義嘅欄杆,內心即刻沉咗一沉:其實說穿了,都不過係設計者用來趕走露宿者嘅計謀吧。」
渣渣輝
睇嚟渣渣輝對呢個公園都有唔少感受。咁爬爬呢?爬爬都要交功課講兩句㗎喎!

「如果張凳唔俾坐,你仲可以坐喺邊?無錯,就係坐喺張凳嘅隔離啦。疫情之下,所有嘅休憩設施都俾膠紙封曬,連想搵個地方抖吓都冇。但又有冇人諗過,其實只要喺隔離鋪個垃圾膠袋,就已經創造到一個屬於自己嘅空間。講就梗係易啦,到做嗰陣就會擔心,咁樣會唔會唔啱規矩呢?其他人又會唔會望實我呢?而選擇乖乖地留喺屋企。直到鼓起勇氣,唔理其他人點諗,自自然然,就會有第二個、第三個跟住一齊做,慢慢就形成咗個社群出嚟啦。」
爬爬
好啦!接受爬爬都叫做有做嘢。其實當日仲有埋小編Mann喺到架。不過佢比較似做保姆咁囉。不過所謂旁觀者清,話唔定佢又會留意到啲唔同嘅嘢。


「兩位小編筆下嘅葵芳街市上蓋係一個世外桃源,喺煩囂嘅香港市區可以搵到一個咁嘅地方,靜靜地咁同三五知己聚下,實在係一件唔容易嘅樂事。即使係土生土長嘅香港人,都未必可以好似呢班席地而坐嘅工人姐姐咁生活逍遙。但正如爬爬所講,空間係自己勇敢地創造出嚟嘅。香港人生活感覺到處受限,但歸根究底,我地會唔會都係俾自己所限呢?」
Mann 閱

好啦好啦,社區小隊嘅report就係咁多!大家記得繼續留意我地社區小隊啦!Peace out!