葵青區 - 葵盛西邨街市

上次我哋就去完葵芳街市上蓋啦,但社區小隊又點會輕易俾一個spot滿足到呢?我哋之後一路向上探索,行行吓就嚟到西邨嘅街市。哇!因乜解究星期日個街市空成咁啊⋯⋯

「因為疫情關係,以往人山人海嘅街市不復以往。環顧四周,只係得返幾間舖頭仍然有開門,坐喺舖頭裏面嘅伯伯甚至冇再打算招徠顧客,只係靜靜咁坐喺度,睇下電視過下日晨。但原來即使呢個街市已經差唔多冇晒人,都可以睇到好多呢個社區嘅日常生活痕跡:因豬肉佬日日斬豬肉而斬到蝕晒嘅砧板;好有年代感但仍然屹立不倒嘅舊式舖頭;用繩串埋一齊而隨時可以拆個落嚟俾你嘅膠喉管……呢個係一個冇乜人嘅街市,但同時係一個充滿生活嘅街市。睇住事物說故事—無聲勝有聲。」
Mann

哇⋯⋯小編Mann望住個無人嘅街市都留意到咁多細節,唔知爬爬又有咩觀察呢?

「點解呢個街市咁特別嘅,人又冇,貨又冇,得返個空溜溜嘅走廊,想搵間舖頭買少少零食都搵唔到。睇番先知,原來最近村入面持續爆發疫症,好多人聽到葵盛西邨呢個名都已經走唔切。就連送外賣嘅,寧願接少張單都唔敢行入去。我諗,住喺到嘅人都已經匿曬喺屋企,所以冇人去開鋪啦。睇真啲,原來靜嚶嚶嘅街市真係好特別,唔驚會俾地下啲膠袋跣親隻腳,又唔怕會有水彈上條褲,仲可以喺到跑嚟跑去添。不過,唔知要再過多幾耐,街市先恢復返原來嘅樣貌呢?」
爬爬

貪玩嘅爬爬去到邊都諗住玩。其實唔講你唔知,我作為社區小隊負責人,都係事後先知當日爬爬趁個街市冇人,喺度跑嚟跑去玩伏匿匿。不過我真係唔明有咩好玩喇,一於睇下最冷靜嘅渣渣輝又點睇啦。

「從文中同相片入面俾到筆者最大嘅感受只有一個字:靜。或者由街市以外嘅人嘅角度嚟睇,感受到嘅係一種悠閒:伯伯坐喺舖外讀報、走廊開闊嘅陽光毫不吝嗇咁照入嚟。不過背後有啲難過嘅係,筆者同另外兩位小編當日前往街市嘅日子係星期日。星期日嘅街市竟然水靜河飛,人都冇多個,連想打聲招呼、問候吓嘅機會都冇。希望街市可以早日回復原來嘅光景,到時可以再嚟細味人情啦。」
渣渣輝 閱

唉,其實係有少少唏噓嘅。好啦!今次嘅社區小隊嘅報告就係咁多。各位下次再見啦,保重身體啊!