葵青區 - 序

今次社區小隊前往嘅地方主要圍繞住葵芳同葵盛。兩者同屬葵青區,橫跨區議會兩個選區。兩區人口合共約38,000人,當中以30歲左右嘅人為主,15歲以下及65歲以上人士佔少數。

根據我哋社區小隊嘅觀察,葵芳近葵廣及地鐵站一帶經常熱鬧非凡,偶有不同組織同政黨會喺兩者交界擺放街站。而葵廣更係人來人往,幾條嘅美食巷一到午飯時間就水洩不通。而隔離嘅新都會同樣多人,不過估計因為商場平均消費較葵廣高,相對無葵廣咁多人,而且少見中學生「蒲」。不過新都會嘅人造草坪喺疫情下成為咗大家嘅聚腳地,唔少人都會喺葵廣「掃街」後於草坪享用啱啱買翻嚟嘅美食。

穿過葵芳街市,拾級而上後左轉直行,搭架高高嘅升降機就嚟到葵盛西邨。西邨同葵芳一帶唔同:人少,邨內無太多店鋪,以家品店及餐廳為主。居高臨下嘅西邨擁有一份市區失卻嘅寧靜,沿路各處都伴隨住涼風送爽。可惜嘅係因西邨曾受疫症影響,出隊當日邨內較為冷清。沿路見到唔少隨手拋棄嘅垃圾,數量之多,雖然唔係十分誇張,但足夠令人留意得到。如此清幽嘅一條邨卻滿佈垃圾,實為可惜。

嚟緊一連三post,社區小隊將會每星期帶大家以另類角度遊葵青。大家記得密切留意我哋WannaPlay喇~