荔景?食得㗎?邊個荔邊個景先?

📌 你知唔知香港有個地方叫荔景?

一講起#荔景 ,你又會諗起啲咩呢?老人邨?情殺案☠️?(有興趣嘅朋友不妨search吓)出荃灣咁啱經過嘅地方?或者更多時候,荔景只係一個名不經傳嘅小地方。🤥

其實荔景,又指#荔景山 ,整個社區都係圍繞住呢座山而展開。⛰由山下嘅荔景邨公共房屋開始,上行至早期居屋 #悅麗苑 、 #荔景體育館 、 #紀律部隊宿舍、部分私人屋苑,再途經收容女性青少年在囚人士嘅 #勵敬懲教所 及消防局,然後下行至 #瑪嘉烈醫院荔景大樓 再翻返去 #祖堯邨 。大約為時兩個鐘嘅路程,總算係行到荔景嘅大約5分之3嘅地方。仲未計中間無提到嘅幾間小學同中學,荔景呢個地方真可謂「麻雀雖小,但五臟俱全」。🐦

📌 荔景=老人邨?👵🏼🧓🏼

荔景呢個地方成日俾人話係老人邨。因為呢到有著名嘅 #松齡舍 ,一個由1978年落成,專俾長者入住嘅公共屋邨。入面除咗有更寬闊嘅通道、更慢嘅生活節奏,仲有專為長者而設嘅會所。你無聽錯!住喺到嘅老人家隨時就可以落樓下做gym㗎~💪🏻

而且位於地鐵站隔離嘅荔景邨係一條於1973年落成嘅公屋邨,日常的確見到不少長者係邨入面出沒,加埋條邨又有大量為長者服務嘅社福機構,真係幾似老人邨呀!😜

不過其實荔景除左呢兩條屋邨,仲有上面所講嘅私人屋苑、紀律部隊宿舍同居屋。根據2016年嘅人口普查,呢啲屋苑嘅年齡中位數都唔算高。其實overall荔景嘅年齡中位數都只係46歲左右,唔係真係咁老㗎。不過可能因為區內無咩購物、玩樂好去處,因而較少年輕人會經常出現喺荔景,大多都會走咗去鄰近嘅葵芳行葵廣。

📌 荔景,一個舒適、怡人又神秘嘅地方🏞🗿

沿住荔景山行上去,其實唔難發現荔景係一個令你忍唔住放慢生活節奏嘅地方。就以#祖堯邨 為例,邨中間有一個屋邨商場,商場設計通風舒爽,而且處處都有自然光。大部分地方雖然無冷氣,但喺入面行都唔會覺得熱。仲有幾間屋邨茶記同家庭式經營手搖飲品店👅,真係一個好寫意舒適嘅地方嚟㗎。

至於其他荔景山嘅地方,好多都真係靚到目不暇給,特別夜遊時更添一份神秘感。我地就曾經去過#下葵涌診所 背後嘅絕密位置,雖然被曱甴所包圍,而且喺暗角處又有一架令人覺得不寒而慄嘅單車殘骸🧟‍♀️。不過牆上嘅塗鴉同地下大量未燒嘅蚊香都讓我地知道,呢到都會有人不時出沒嘅🚶🏻‍♂️。繼續上山更發現到有地方可以遠眺 #維港 景色,煙花都睇到添呀!

有關荔景,今次就講到咁多先。嚟緊社區小隊會再同大家深入介紹荔景,大家記得密切留意逢星期二晚嘅「社小」post啦!Peace Out!😎