深水埗 - 有日晏晝,我哋闖入咗個「有啲娘」嘅香港商場

📌 西九龍中心

1994年落成嘅西九龍中心,唔知你又留過幾多腳毛喺到呢🥸?初期曾有唔少大型連鎖店進駐,包括曾經佔有7層嘅先施百貨(而家變翻3層)。但依然有由不同小商店組成嘅蘋果商場以及環繞住行人道嘅車仔檔。場內仲有過山車、溜冰場、小朋友都入得嘅機鋪、冒險樂園同美食廣場等。不過過山車一早已經喺2003年因為美國發生過室內過山車意外而停用☠️、機鋪嘅機都唔知仲有幾多喺到,而美食廣場都由正常嘅平櫈變成唔腳踏實地就會跣走你嘅斜櫈。🥲

📌 時光停留,物是人非

一行入呢個商場,大大條龍🐉就映入眼簾。依家仲邊有商場會用啲咁嘅design 㗎,都真係有啲娘喎...🤡但就係呢種「有啲娘」嘅味道先係西九龍中心嘅最大特色。沿扶手電梯再上,嚟到商場嘅一樓。咦?牆上嘅呢啲係...𡃁模👙?唔知幾耐冇聽過呢個term 喇,記得當年𡃁模湧現,本本娛樂週刊嘅封面都係佢哋😳,書展仲因為佢哋搞到沸沸揚揚添🔥。不過逐漸「𡃁模」呢個term 就越來越少人再提起,而呢班𡃁模嘅身影就一直停留咗喺西九龍中心嘅牆紙上。

📌 平民價錢,選擇多多

依家大家都滯留喺香港,冇得去旅行,香港其實有咩好行😐?樓下大商場都係差唔多格局,旺角地舖又係嗰啲,平嘅全部都係大型連鎖店🔗,其他少見嘅又貴💵,最後都係得個行字,行多陣都悶啦🙄。喺西九龍中心呢度雖然都避唔開一啲連鎖店,但總算係一個容納到唔少小店嘅地方😗。學生最愛嘅格仔舖?有!專賣figure 嘅舖頭?有!賣手作嘢嘅舖頭?連賣假髮、賣姓名貼紙(即係以前小學print 自己個名出嚟,貼喺書封面嗰啲)、賣傳統香港小食、同盲人按摩嘅舖頭都有,你要啲咩?你講得出,我幫你搵搵👀?再搭lift 上food court 睇睇,有種葵廣嘅感覺😋,大部分都係小店,價位同菜式任君選擇。喺呢度,你真係會覺得自己係有選擇嘅。就算budget 有限💰,但都唔會覺得好將就,仲確保你食得飽🐷。其實比起啲一式一樣嘅大商場,我諗呢個俾人真正有選擇嘅商場,似乎更加吸引🤨。

文:小編Mann

📌𡃁模?正啊!

作為一位男性,望到西九入面嘅𡃁模相真係勾起萬千回憶。好似小編Mann話齋,當年2011、2012真係報紙、雜誌全部都見到佢地嘅身影。周秀娜、Jeana、Mia、Dada…… 當時小編我仲讀緊初中,情竇又初開,見到呢啲𡃁模內心真係非常激動(其實唔止得個心激動)。而家見翻真係想流下時代嘅眼淚。某程度上,西九透過佢嘅佈局設計,鎖住咗某個年代嘅回憶。當年小編拍拖都會嚟西九呢~

渣渣 閱