深水埗 - 日夜遊「鴨記」— 鴨寮街入面你會見到啲咩人?

📌「唔使好靚,好使好用就可以」

「鴨記」- 鴨寮街已經成為咗香港旅發局推薦嘅一個景點。呢到嘅人來自五湖四海,抱住「尋寶」嘅心態喺到行行企企🚶🏻‍♂️。唔使多講,或者你一行入鴨記就已經諗住買唔同嘅電子產品。🎧唔使好靚,好使好用就可以 — 或者呢句說話代表咗成個鴨記。無論係嚟買袋、衫褲鞋襪定其他林林總總嘅產品,大概嚟得鴨記都係呢種心態。小編仲試過用$140買到一支可以照上6、7層樓高嘅電筒添!💡

不過除咗產品外,你有無認真留意過鴨寮街其實有啲咩人呢?

📌日光下嘅地攤檔主

小編當日大概兩點鐘到鴨記,喺路口已經見到唔少人擺賣。有啲固然係鐵皮檔嘅檔主,但檔與檔間偶爾混雜住擺地攤嘅人。🧘🏻以往對深水埗地攤檔主嘅印象都係相對弱勢,不外乎都係拎啲殘破嘅二手物喺到買賣。不過當日所見有位地攤檔主似乎有啲好貨,不停都有啲叔叔嬸嬸同工人姐姐圍埋去。而個男檔主看似極為享受做老闆嘅moment,一邊叫賣,一邊不時面露笑容。💆🏻‍♂️可惜行咗無幾耐,有位婆婆同auntie就唔係咁好彩。只見食環嘅職員著住長長嘅黑色外套行到佢哋面前,粒聲唔出,auntie同婆婆就慢慢執走地上嘅貨。其實食環職員趕走小販嘅準則係咩呢?🤷🏻‍♂️

📌入夜後嘅鴨寮街

小編夜晚9點幾又去咗轉鴨記。好明顯地,夜晚出沒嘅人同日頭非常唔同,有時會見到喺到自言自語、漫無目的咁行嚟行去嘅人🗣,又會見到有啲南亞裔朋友仔喺到大聲講大聲笑,嗰份陌生感的確會令人一下子感到不安。不過行入少少,好快又會見翻熟悉嘅香港叔叔嬸嬸身影。晚上嘅鴨記一帶,街上垃圾非常多,基本上街邊全部都堆滿晒發泡膠同一攤攤污水。然而,咁樣並無阻南亞裔小朋友喺條街到跑來跑去,甚至仲有不少「街坊look」嘅人穿梭其中添!偶爾都會見到一兩檔地攤。其實曾幾何時呢啲地攤多到組成咗深水埗嘅午夜墟市,不過而家只係得翻幾檔賣啲殘破二手物。行前少少,有一間泛著黃光、賣音響嘅鐵皮檔仲開緊。檔主同朋友喺店內坐低一路吹風一路聽歌,聽咩就唔知啦,不過間鋪好似有啲格調,為令人感到陌生嘅晚上帶來一點點嘅溫暖。🏮

文:小編 渣渣

📌 點解點解?
深水埗係一個好有趣嘅地方,佢有一個屬於自己嘅生態,一個喺香港其他地方都好難搵到嘅環境,同一群唔知點解會出現再聚喺同一個地方嘅人。點解有啲叔叔嬸嬸唔知喺邊搵到啲二手嘢,就可以開檔賣?點解夜媽媽會有細路,喺條隨時見到老鼠曱甴嘅街度跑?點解明明周圍啲舖都閂晒,街上亦已經冇乜人,但仍然有間鐵皮檔燈火通明,播住歌咁chill?點解樓上係唐樓劏房,樓下就係賣緊40蚊一杯咖啡嘅cafe?點解點解?深水埗係一個會令我哋問好多「點解」嘅地方。或者每個嚟深水埗嘅人都會搵到唔同嘅「點解」,再將自己嘅答案帶走。

小編 Mann 閲