深井 - Hea入深井海濱,勇探海旁「私竇」?

📌碧堤半島❓咁熟嘅個名 ⁉️

碧堤半島 — 可能你細細個就聽過。呢個咁大咁靚、單位數量接近3,300個嘅私人屋苑,入面有私人會所同泳池。前面就係遼闊嘅海岸,遠方則可望到青馬大橋同汀九橋。同時睇翻網上資料,原來唔少藝人都係(或者曾經係)呢到嘅住客,例如好多人都認識嘅麥長青就係其中一員。

不過我哋社區小隊無緣入屋苑內,真正逗留得最耐嘅,係相連嘅公眾地方 — 碧堤半島海濱長廊。Google呢度嘅資料,第一個彈出同長廊有關嘅竟然係一大堆「不准事項」。 打波、放狗、釣魚樣樣都唔俾,認真掃興。🙂

📌海濱有台灣嘅味道🤤

當日我地喺海濱長廊逗留咗接近一個鐘。雖然海濱長廊真係好長,不過我哋一到起點就幾乎再無離開過。遠望座立住青馬大橋嘅靚海景,隔離係一班一早已經霸定唔同靚位、甚至有埋私家太陽遮嘅釣魚人士,wuuu~~認真寫意。有見及此,小編都忍唔住跨過圍欄出咗岸邊嘅大石上坐咗陣。當日又有太陽,海風又唔算大,對住個海個人暖暖地,真係好chill~~😙

回想起幾年前自己去過台中對出、被太平洋🌊包圍嘅綠島。當時因為等朋友喺紀念品店內買極都未出嚟,有幸花咗啲時間坐係岸邊吹海風、望大海。嗰次真係望足差唔多半個鐘都係意猶未盡,內心好似好多感受慢慢湧現。幪面超人曾經講過:「如果你懷疑人生,可以去望海」。諗諗吓可能都有啲道理。🤨碧堤半島海濱長廊嘅起點俾到少少呢種感覺我,不過始終身邊多咗啲有專業設備嘅釣魚人士🎣,都係少咗份純樸。

📌私竇後花園 ⁉️

離開入口向前行,好快就見到傳說中嘅碧堤半島私人屋苑。當下前面係海,後面就係被石欄圍起嘅「私竇」。偷偷地望入「私竇」:有花園仔、有泳池;大力索一索:心曠神怡呀!有時真係覺得明明大自然係每個人本來應有嘅野,因乜解究一個可以休息、放鬆嘅環境,喺香港都要有咁多錢先enjoy到、仲要係人造花園先有人打理同愛惜呢?唉,真係要chur翻支煙定定驚先得。🚬(誤)

文: 渣渣輝

📌無錢氣都唔俾抖?

細細個行過海濱長廊,俾人一種好開心好寫意嘅感覺,嗰時候拖住屋企人隻手,慢慢欣賞下對岸嘅風景,身邊有人跑吓影吓相,休休閒閒咁就一日。有時諗如果將來住喺附近,一落樓下就可以望吓海,感覺都幾嘆吓。

到咗大個先發現,原來好多嘢都要有錢先做到,好似渣渣咁講,有個靚嘅海景,配條海濱長廊,冇咁上下嘅收入都唔使諗,自己搭車入嚟睇吓算啦。有時我會諗,如果有錢,想住邊就住邊,但冇錢嘅話,莫講話有自己嘅一間屋,甚至連抖吓氣嘅時候都冇,同樣都係生活喺香港,點解會差咁遠呢?

爬爬閱