深井 - 只想靜靜咁坐喺沙灘...望下汀九橋

📌汀九點樣嚟?

聽到汀九呢個地方,你會諗起啲咩?冇錯,就係汀九橋啦。唔講唔知,原來汀九橋已經有22年歷史,嗰陣邀請咗來自德國嘅Schlaich Bergermann Partner去設計,加上38個月嘅施工,喺1998年5月正式啟用。順帶一提,你見到有條好似長木棍嘅物體,由地面穿到上半空,嗰條叫做單支柱橋塔,由中間延伸落來嘅拉索,承托起成條橋嘅重量。原理就好似玩搖搖板,每邊都有車經過嘅時候,啱啱好平衡返兩邊嘅重量,等汀九橋可以停留喺半空之中。

📌 闖入禁區

話說當日去到汀九灣沙灘,見到一個人都冇,心諗個沙灘仲唔係我哋嘅!點知突然之間聽到廣播:「因應2019年預防及控制疾病條例...」oh noooo要俾人趕走啦,其實呢樣又封,嗰樣又唔俾,就算確診數字跌翻落嚟,大家都已經喺屋企屈到有病啦……

繁忙生活入面,間唔中偷少少時間出嚟,去個寧靜嘅地方坐吓抖吓,細心欣賞吓,我發現原來香港都有好多好靚嘅景色。

爬爬

📌肺無事,心有事?

以前見到啲大橋座立喺大海,啲車喺橋上面駛嚟駛去覺得好神奇,睇咗爬爬對汀九橋嘅簡介之後,好想親身再去汀九橋睇吓,認真咁望吓條橋嘅結構,欣賞吓工程師嘅一番心機。

知道呢個世界會一直係咁改變,但唔知幾時開始,一啲本來覺得好平凡嘅事都變得奢侈,一啲理所當然嘅事變得遙不可及。不過爬爬想喺假期嘅時候喺沙灘靜靜地咁望吓個汀九橋,但竟然咁樣都已經不再被容許。佢哋話咁係因為疫情,但好似爬爬話齋,遲啲大家就算冇感染疫病,可能心都已經屈到病啦。唔知疫情過後嘅世界,會變成點呢?

小編Mann閱