年中回顧

話咁快,社區小隊系列已經做咗半年有多嘅時間。

咁啱今個月好多社小嘅成員都多咗放假,難得有得唞,今個月嘅社小片暫停一次,一齊嚟回顧一下我哋嘅往跡啦!

📌啲地方點揀㗎?

渣渣:無㗎喎,一開始都係臨時傾傾吓諗出嚟。後來係睇吓當時有無啲地方可以match到社會議題而再去fact check吓嗰個地方係咪真係好似我哋諗咁。

Mann:有時我哋會一齊傾吓大家對唔同區嘅觀感同睇法,然後就會實地去睇吓嗰度係咪真係同我哋本身嘅諗法相似,定係會有一啲新嘅角度去睇嘅個社區。

📌係啲咩令你哋搞社小,愛定責任?

渣渣:我嘅諗法單純係想透過用唔同嘅方法同一個社區互動,展現香港唔同嘅面向俾大家,引起共鳴或反思,希望可以加強凝聚力。

Mann:除咗想令大家更加認識唔同嘅社區之外,其實做社小系列有時都係幾fun嘅。過程中我哋會遇到唔同嘅人,可能會有啲意外嘅經歷。希望透過我哋嘅post 同影片,可以帶大家一齊體驗我哋嘅經歷。

📌最難忘嘅一次經歷

渣渣:有次去中環同個日本人講嘢,佢提到香港好方便,想行山就咁坐車就到。諗諗吓又係喎,有啲地方喺內陸真係山都無,就好似我哋成日話行海傍,其實可能有人成世都無見過海。呢啲故事一方面令我更覺得香港好特別,亦令我好好奇其他地方嘅生活係點。

Mann:最深刻嘅一定係太子中伏記啦!睇住個app 入面嘅民宿相,本身以為今次社小仲唔歎返次?點知……原來同交友app 一樣,圖片只供參考,upload 得嘅全部都係就晒角度嘅相......不過亦都係因為中伏,我哋最後都係體驗到一晚幾貼地嘅太子唐樓生活。

📌有冇遇過啲好特別/深印象嘅人

渣渣:梗係有啦!之前去荔景嗰次,唔知係咪我哋人太多又拎住相機,有個保安行過keep住睥住我哋。我心諗:其實我哋都係靜靜地拍嘢,又唔影響居民,點解少少空間都唔想俾我哋呢?之後我對屋邨保安嘅感覺都係非常一般。去到堅尼地城,就算預咗俾人趕,個保安開聲嗰下都係忍唔住有難堪嘅感覺。

Mann:我記得有一次去上環嘅一個街市拍片,想訪問嗰度其中一個檔主。一開始佢都幾有戒心,唔太想俾我哋訪問。但喺了解多咗之後,發現原來佢都好願意我哋呢啲「後生仔」分享,去講返佢喺呢度擺檔幾十年,一直以來觀察到嘅人事變化。因為同佢嘅一段對話,呢個地方突然多咗一份濃厚嘅人情味,將地區同人連結咗一齊。

感想
小編TT:
由剛開始到依家,社區小隊已經開始咗半年有多,見到各位隊員一齊進步,再一齊「柴娃娃」去社區考察,當中太多珍貴嘅回憶。雖然呢個project好有挑戰性,當中仲遇上過唔少困難,但我哋都咬緊牙關做好。

作為幕後製作人員,參與過太子、荔景、石硤尾等社區考察,由諗每個月去邊個地方,到site visit,花足大半日時間慢遊該區,諗拍片idea,到真係落實去拍,過五關斬六將後就係大家喺度見到嘅post同片!除咗真係好想大家對嗰區多啲認識之外,仲意外收獲一大堆同社小成員嘅回憶。我哋都好想將呢份感覺傳遞俾大家,令大家睇到我哋post同片之後,都多啲約朋友出吓街,行吓唔同社區,發掘各區嘅特色,締造屬於你同朋友對嗰區嘅回憶。

渣渣:
其實做社小真係好難,特別我哋唔係咩城市研究背景,自己只係社工出身,唔識攝影,唔識拍片,好多嘢都係靠隊友同喺個過程中摸索出嚟。雖然到而家都未算有咩好成績,但見到社小穩定嘅like數都係一種無形嘅鼓勵。或者小弟所做嘅嘢真係唔夠好,有時都唔係好知可以點樣做好啲,想做又有心無力咁=,希望嚟緊可以慢慢搵到個方向啦。

Mann:
其實每次做社小系列,我哋嘅團隊都好怕做完係「交行貨」,會諗大家睇完會唔會有種「又係呢啲」嘅感覺,所以每次我哋去一個新社區都覺得幾有挑戰性。點樣先可以搵到啲特別嘅地方,搵到一啲唔同嘅角度去同大家去睇呢個社區?點樣先可以令大家都覺得認識呢個社區係有趣嘅呢?呢啲問題我哋每次都會問,亦成日為此苦惱。所以嚟緊嘅社小,都會希望可以收集到大家嘅意見同feedback,令我哋嚟緊嘅社小系列做得更好,大家睇得更開心同enjoy 啦!

文青:
作為團隊當中嘅攝影師,每次出隊都提醒自己要嘗試發掘當區嘅獨特之處。同小隊成員走過8個社區,穿過大街小巷,感受城市嘅節奏。每次拍片前開會度橋都希望試多啲唔同風格,突顯社區不同面向俾大家睇。敬請期待我哋未來喺內容上有更多突破啦!

📌未來展望

嚟緊社區小隊會繼續同大家以不同方式走訪社區,亦會持續求變。雖然我哋有成員未必可以再咁大程度咁參與,不過我相信幾個人走埋一齊,就可以產生一啲改變。敬請留意啦!Peace out!