夜遊荔景山 - 遊走人生百態 體會變幻永恆

📌 荔景山係咪養生好地方?

有人話 #荔景山 又叫做 #荔枝嶺,之所以最尾叫咗做荔景係因為 1)景靚(麗景),又或者 2)可以睇到荔枝角灣嘅海景🏞。經歷過70年代政府大興土木,而家上下一帶已經起齊 #公屋 、居屋、私樓,仲有中小學🏢、消防局🚨、懲教處、醫院同護老院等等,可謂包羅萬有。喺荔景山生活,有咩緊急嘢都唔使擔心,唯獨每晚九點後小心餓死。因為荔景山住咗咁多人,但餐廳真係10隻手指數得晒囉。😟

不過就咁睇又點會睇到荔景山真實嘅一面?社區小隊一於同大家行一次荔景山!

📌 我喺荔景山見盡人生百態👨‍👩‍👧‍👦

小編第一個停留嘅地點,正正係山下 #荔景地鐵站 對出、往 #貨櫃碼頭 嘅天橋🌉。當日拎住部相機行喺橋上,左邊係通往市區嘅幹線,右邊(應該)係 #東涌線嘅行車天橋。當晚仍然係非常濕熱嘅 #香港 夜晚,不過為咗影低兩架列車同時出現嘅一刻,唯有忍一忍。「咔嚓!咔嚓!咔嚓!」📸連續影咗幾張相,相入面嘅天空比肉眼所見嘅藍,畫面有啲似#新海誠 動畫入面,所展現大都市嘅忙碌、同人生活喺入面嘅孤寂。

離開荔景地鐵站,我哋經 #下葵涌分科診所 後嘅小路上 #麗瑤 。路上並無街燈、而且要途經診所後嘅去水渠,非常有廢墟探險嘅感覺。部份牆有大型塗鴉👾,地上有啲未用過嘅蚊香、食剩嘅飯盒同大量曱甴🪳。本來想影相做個記錄,不過行到一半,見到陰暗處有個人喺到瞓緊覺。估計對方應該喺到生活,所以最尾都係急步行過,以免打擾對方。

唔使幾耐就抵達 #麗瑤 。遠處見到有兩條螺旋型樓梯可以通往街市頂嘅 #平台 ,諗都無諗就行咗過去。之前曾經喺到影過啲好「#王家衛 feel嘅相」,感覺好迷好濛咁😵‍💫。不過當日除咗影相外,實在太攰太熱,就買咗枝嘢飲坐喺平台嘅橫櫈上hea。前少少有啲阿姨喺到跳舞做運動,隔離仲有對夫婦喺到傾計,大家都好似趁食飽飯嘅時間落嚟休息一下。我都唔理太多,都係靜靜咁飲晒支嘢。🚬

坐咗陣就繼續起行。最後一站係位於 #護理安老院 隔離嘅#荔景亭。一開始選擇呢個地方作為荔景山嘅終點站,純粹係因為呢到望到維港而又有個落腳地,除此以外好似都無咩特別。當小編到達時,見到有一對情侶專登買埋嘢食,坐咗出去欄杆外。或許係因為太熱又有蟲,雖然有維港嘅景色相伴,都無法令佢地安頓落嚟享受晚餐。其實仔細啲睇,#維港 嘅景色係俾遠處工地嘅天秤擋住咗🏗。反而隔離有三個南亞裔嘅朋友,手貼手乜都唔理,就咁坐喺一塊介紹板上面傾偈,感覺更加寫意😙。

📌 Is it just me, or is it getting crazier out there? (Joker, 2019)🃏

小編起初打呢篇文時,本來想寫少少自己被日常高度擠壓嘅生活,喺夜遊荔景山嘅過程得到釋放。不過一路回想,內心感覺卻愈嚟愈壓抑。寫到荔景亭時,內心浮起咗一啲疑問:其實係咪我地太嬌生慣養,已經唔再適合呢個地方呢?係咪我地都好似嗰對情侶咁,有太多期望,反而無法適應呢到嘅環境呢?

喺無力感時刻充斥住嘅呢一刻,大概諗通頂都唔會有答案。或者有答案前,生活喺高速運轉嘅香港入面,只能一邊享受被人需要嘅滿足,一邊感受難堪非常、生活迫人嘅感覺。社會變成點,已經唔再係我哋可以改變嘅事情。

2020年香港電影金像獎預告片,入面有一句對白,我強行譯咗佢做廣東話:
「如果我哋已經好努力,呢個世界無變得更好,咁點算?」

荔景山,有孤寂嘅地鐵景,有默不作聲嘅露宿者,有享受炎夏閒暇嘅家庭,亦有無法安頓嘅情侶。百感交雜,有時即使生活喺家鄉,都難免會有一種唔喺自己「地頭」嘅感覺。

成日話愛係恆久忍耐,英文譯本為 Love suffers long,即愛係恆久忍受痛苦。或許對自己土地嘅痛苦,就係對自己土地嘅熱愛。