堅尼地城堅離地? 我在堅尼地城放空自我的日子。

今次我哋社區小隊嚟到堅尼地城。堅尼地城作為最早俾英國佔領嘅殖民地之一,佢嘅名係嚟自第7任港督— Arthur Edward Kennedy,攞咗最尾嗰個字Kennedy而命名。講得係最早期嘅殖民地,或者當時對土地經濟發展嘅想像唔夠而家進取,堅尼地城仍然維持一個建築密度相對較低嘅狀態。當日小編去到,雖然街上人都算多,不過感覺確係無咁焗促。

📌 堅尼地城係咪真係好離地?

堅尼地城算唔算好離地呢?一於我哋「向錢看」。

2016年全港嘅人均每月收入中位數大約為$15500,而當時堅尼地城居民嘅每月收入中位數為$16000,都算係略高於全港收入水平。不過當時嘅每星期平均工時係44.3個鐘,而住喺堅離地城嘅人則係43個鐘。唔好睇落只係早收人哋1個鐘,所謂「早收一個鐘,坐車很輕鬆!」

其實堅尼地城內雖然都有不少高尚住宅,不過因為始終係一個舊區,區內仍有不少相對無咁離地嘅地方,例如以前俾白領入住嘅西環邨公共屋邨,而且即使有唔少cafe,我哋仍然可見不少「茶記」林立,行遠少少仲有熟食中心,價錢絕對親民!

📌 如果人生好累,可以去堅尼地城。

當日我哋去到港鐵B出口,一出就見到四圍都係唔太高嘅舊樓,亦有啲茶記同文青咖啡店。行遠少少好快又會見到海岸,四周圍都有不少綠色植物。行上啲就可以去到豪宅區,盡頭仲有個疑似荒廢已久嘅建築物,牆上滿佈塗鴉。沿住建築物樓梯而上,好似可以去到一個深山咁嘅地方。

堅尼地城彷彿好似喺忙碌同閒適之間有一個微妙嘅平衡:呢到有熙來攘往嘅人群、看似壓抑嘅建築;亦有喺海旁、公園優哉游哉嘅一家大細、令人不禁停下細賞嘅廢墟。

嚟緊我哋社小會同大家一齊探索堅尼地城慢活嘅一面,帶住社區嘅溫情享受治癒feel嘅生活。記得唔好錯過之後嘅社區小隊post啦!