中環 - How you doin'? — 卑利街酒吧巷

行吓行吓我哋嚟到咗蘭桂坊?咦,等陣先,好似認錯咗地方,呢度係卑利街嚟咋喎,未到呀。不過都好似好熱鬧咁,去睇吓先⋯⋯

📌 先謙卑,後享受

「經歷咗呢一年,我成日都會覺得單係聽到香港呢一個名就已經俾到一份親切感自己。但一踏入呢條街,即刻感受到呢度唔係我「地頭」:好多衣著、語言、口音唔同嘅人聚埋一齊喺到飲酒。行到入嚟,完完全全感受到咩叫做格格不入,甚至真係有啲淆底。我哋前前後後行咗幾次,心諗自己點解會咁驚青呢?突然發現,呢條街其實係一條提醒自己要謙卑嘅街。當我慢慢放低嗰種喺香港要當家作主嘅心態,仔細睇吓啲人嘅交流、聽吓佢地講乜,嗰份驚慢慢消退,取而代之係一種雀躍同興奮:呢班喺度吹水嘅年輕男女,感覺同自己完全唔同,唔知佢哋嘅生活又係點呢?」
渣渣

反正依家冇得去旅行,渣渣你嚟呢度同啲外國人傾吓計,認識吓其他國家嘅文化同外國人喺香港嘅生活,感覺都好似幾有趣呀!

📌快樂一直係身邊

「其實點樣先可以活得快樂?細細個嗰陣,有得返學同朋友周圍玩,周圍去,就已經好快樂。到大個咗,快樂好似變得珍貴咗好多,要賺好多錢,周圍去旅行... 仿佛快樂同我哋相隔好遠。再睇吓眼前呢班人,淨係飲吓酒,吹吓水就已經咁開心。有時會唔會只係我哋不斷去追求快樂,卻遺忘咗其實快樂一直都係我哋身邊。」
爬爬

生活喺香港,快樂好似好難。但我諗就好似爬爬你咁講,快樂同時可以好簡單,只係在於我哋有冇留意同捉緊當下嘅感受。

📌不同角度,不同感覺

「同一個地方可以帶俾人唔同嘅感覺,呢個地方對渣渣嚟講可能係又陌生又好奇,而對爬爬嚟講就係一份簡單嘅快樂。可能有人會話身處嘅環境會直接影響我哋嘅感受,但更加重要嘅,可能係我哋點樣理解當下嘅處境。如果我哋換個角度去睇同樣嘅環境,或者我哋會有一份唔一樣嘅感覺。」
Mann閱

聽晒三位小編咁講,搞到我都有啲想去呢度行吓添,唔知到時我對呢個地方嘅感受會唔會又同你哋唔一樣呢。咦?下次好似又去新一區喇喎,小道消息話呢區有啲冷門,但又幾有趣。想知道下一次社區小隊去邊,就請大家繼續留意我哋出post 啦!