中環 - 堅道花園,一個有城堡嘅公共公園?

在中環行咗咁耐,梗係要搵個地方抖抖啦,咦,前面個公園好似唔錯喎,一於入去睇下先。

📌有誠意嘅公園

「公園?呢度係康文署嘅公園?有啲唔公平喎...明明平時見開嘅公園都係一式一樣嘅,點解呢個可以靚成咁,成個主題樂園設施咁架?呢度唔單止有設計,仲有一塊平坦嘅空地俾人玩吓hea 吓,而啲設施仲要冇甩油嘅添!咁有誠意嘅公園,喺香港真係非常少見,小編Mann 表示非常羨慕... 如果喺中上環以外嘅地區都可以搵到就好喇。」
Mann

小編Mann如果想自己樓下個公園好似呢個咁,直接搬過嚟中環住啦。

📌要人用心感受嘅地方

「一行入嚟,第一個感覺係:「城堡之嘛,好普通啫,叫做有個外型,油過下油咁囉。」。唔知係咪平日俾生活磨滅左對環境嘅敏銳觸覺,望乜都好似見怪不怪咁。反而,當我慢慢回顧翻當日嘅相,竟然先有果種俾鮮艷顏色同城堡外型嘅震撼到!從城堡內部望返出去,舒適之餘仲有一絲童話故事中嘅神秘感。或者,可能係平日個心太忙太亂,唯有當個心靜落嚟時,個心先識去react吧。隔離嘅醫學博物館同樣有種平和感,可惜,張相始終係由鐵欄影出去,嗰種冷冰冰嘅感覺都係存在。或者對一個地方嘅感覺,有時真係好飄忽,嗰種美好係想追都追唔翻。」
渣渣

講到心入面份感覺...好似好複雜咁,但認真諗諗,又好似幾有道理喎。

📌你覺得靚就得!

「到底點先算係一個靚嘅公園?係好似Mann所講,從外面去觀察個公園嘅設計,對比下其他公園,睇下有冇啲咩特別嘅地方。定好似渣渣輝所講,將個心放慢,細心感受一下佢俾你嘅感覺,再搵返當中嗰份美好。不過,其實唔洗分到咁仔細,只要你覺得靚,佢就係靚㗎啦。」
爬爬

爬爬講嘅冇得輸,只要你鍾意一樣嘢,就冇人改變到你啦。不過要起身行啦,再坐喺到唔願郁嘅話,到天黑都未行完呀。