中環 - 中環地段嘅露天街市

今次社區小隊走入中上環一帶。疫情之下,有啲肚餓就緊係去街市買餸煮飯啦~咦!中環有無街市㗎呢?結志街街市?

📌中環有街市?!

「眼見冇幾遠就已經係商業大廈,呢度竟然有個露天街市,感覺都幾大反差。呢個街市雖然唔算大,舖頭嘅數目可能仲少過大部份人樓下嘅街市,但賣嘅嘢總算應有盡有。偷聽吓檔販同啲客嘅對話,發現原來講唔同語言嘅人都會嚟呢度買餸。原來中環嘅街坊都唔一定淨係行高級超市嘅,或者中環人都唔係我哋想像中咁離地。」
Mann

睇完小編Mann講嘅野,發現其實平時都真係當咗外國人多數「練仙」(唔洗食嘢),唔洗去街市買餸。最多咪行吓Market Place囉,點會去街市㗎。

📌街市中嘅人情味

「室內嘅街市就見得多,露天嘅街市對我嚟講就真係少見啦。行過見到啲水果幾新鮮,順便買咗幾個翻屋企,夜晚又有生果食啦。「咦,你咪係之前買橙嗰個,我賣啲橙甜唔甜吖...」其實係街市偶然聽下啲人嘅對話,即使係俾人感覺冷冷冰冰嘅中環,都會感受到其中嘅人情味。」
爬爬

又講人情味,行唔行啲啊爬爬!不過諗諗吓,或者人情味喺中環出現都算係幾少聽到嘅。

📌難以理解嘅情景

「睇完小編Mann同爬爬以上嘅文字,腦裡面感受到唔同概念嘅衝突。中上環,一個高度商業化嘅地區,但入面有一個乾濕貨街市;外國人,一群感覺只係隨大型跨國企業過嚟,只會係馬莎購物嘅人出現喺香港傳統街市。中上環、街市、外國人,幾個概念撞埋一齊,腦海一片空白:大概外人好難一下子想像到個畫面吧!」
渣渣輝 閱

俾渣渣輝講一講完,中上環嘅結志街街市好似係一個異世界咁。唉,快啲走啦!快啲走啦!如果唔係真係要迷失喺街市入面㗎喇。