中環 - 序

今次社區小隊要去嘅地方係中環嘅後山。平時聽到中環呢個地方,就一定諗起附近起咗好多商業大廈、條馬路好多車、好多人著晒西裝,仲要行得好快添。今日我哋想行入少少,穿過呢個繁囂嘅商業中心,為大家發掘中環較不為人熟悉嘅一面。

我哋沿住皇后大道中轉上去威靈頓街,搭咗條通往半山嘅扶手電梯。沿途見到有好多文青攞住部相機,搵緊個最佳拍攝位置,影低呢度獨特嘅一面。擰轉頭一望,點解有人會喺條街中間停低買餸嘅?原來我哋已經到咗結志街嘅街市。呢度啲檔口好特別,賣嘢嘅檔販係一個個綠色嘅鐵皮屋仔,唔似一般有瓦遮頭嘅街市。佢哋將要賣嘅嘢擺晒出馬路,淨返條啱啱夠俾架私家車過到嘅通道。

行上少少, 我哋就嚟到卑利街。遠遠已經見到好多人拎住酒,咬住份Pizza,坐喺石壆,同身邊嘅朋友一路傾計一路食嘢,仿佛置身喺一個只屬於佢哋嘅空間。再行多陣,我哋就嚟到醫學博物館,但係因為疫情關係冇開到門。不過我哋留意到佢隔離有個好靚嘅公園——堅巷花園。呢個花園嘅設計好特別,用咗紅色同白色做主題顏色,加埋四四方方嘅形狀,俾人一種好似走入咗童話世界嘅感覺。

想知更多啱啱講嗰幾個地方,就要繼續留意逢星期二,等社區小隊為你逐一介紹。先為大家送上呢段慢步中環嘅短片,一齊欣賞中環少見嘅一面。