Monopoly 大富翁 — 俾小朋友玩嘅遊戲?

在座有冇人玩過Monopoly (大富翁),有嘅請舉手🙋‍♀️🙋‍♂️

好似我哋大部分人喺童年時候都有玩過Monopoly,但係你哋覺唔覺遊戲入面不時會出現一啲唔清楚咩意思嘅字😕,例如「派息」、「增值稅」等。點解一個俾小朋友玩嘅遊戲要用啲咁難嘅字🤯?仲有點解要玩到其他人破產,先會有贏家?(我諗呢個係一個破壞友誼嘅遊戲😤)

咁係因為Monopoly 嘅原意其實係一個想俾人明白資本主義弊病嘅遊戲💰,喺1904年由一個叫Elizabeth Magie 嘅人發明。Magie 當時為遊戲訂立咗兩套規則,一套反壟斷(玩家有同一目標,達成目標就一齊贏✌️✌️),另一套就係壟斷(玩家各自累積資產,所有人破產後產生唯一贏家👑),而最後壟斷嘅嗰套遊戲專利被Parker Brothers 買斷,包裝成一個體驗「白手興家」嘅遊戲,並演變成今日廣為人知嘅Monopoly (大富翁)🥸🎩。

雖然係咁,但我諗大家喺玩嘅時候(尤其是喺劣勢嘅時候)都可以感受到資本主義帶嚟嘅嗰種無力感😩,喺某啲玩家壟斷市場後要翻身係一件極度困難嘅事☹️,咁樣嘅話,或者Magie當初嘅原意,或多或少都仲存在喺個遊戲入面啦~😉

文:小編Mann