點解我哋咁鍾意玩?

大家細個嗰陣可能都俾人話過:「成日掛住玩!」

但點解我哋會成日都掛住玩呢?玩究竟有咩咁吸引,令我哋即使俾人鬧,都會一次又一次咁再去玩呢?

原來玩係同我哋嘅成就感同多巴胺分泌息息相關。我哋喺玩嘅時候,腦部會受到刺激而釋放多巴胺。多巴胺係一種腦內嘅神經傳導物質,呢種物質又被稱為「快樂激素」,可以帶俾我哋一種快樂嘅正向情緒。當我哋每次玩嘅時候,腦部都會分泌呢種「快樂激素」,慢慢我哋就將玩同呢種開心嘅正面感覺連結一齊。久而久之,玩就變咗等於快樂,對我哋嚟講係超吸引嘅嘢。

除咗多巴胺之外,玩好多時都可以帶到成就感俾我哋。大部分嘅遊戲都會設計一啲任務俾我哋完成,會計算進度去推動我哋繼續玩落去,連最簡單嘅遊戲都會有分輸贏。當我哋成功完成任務(尤其一啲比較困難嘅task),或者贏咗其他人嘅時候,就自然會有一種成就感。從遊戲當中獲得成就感往往比現實世界容易,而遊戲世界中成功後通常仲會有獎勵,令玩家嘅滿足感更大。喺遊戲入面相對容易得到嘅成就感,滿足咗我哋嘅需求,令到我哋會想繼續玩落去。

其實只要唔好玩得沉迷,影響到健康、他人同個人生活,玩從來都唔係一件壞事。玩可以令我哋嘅生活增添趣味,人都開心啲,甚至令我哋個腦都轉數快啲。所以下次再有人再話你:「成日掛住玩!」,你就可以share 呢篇文俾佢哋睇,等佢哋都認識吓點解我哋會咁鍾意玩啦~

文:小編Mann