現實?虛擬?Mixed Reality!

遊戲世界可以令我哋暫時離開現實生活,裏面幾天馬行空嘅嘢都可以搵到☁️,如果我哋真係可以入到去遊戲世界就好喇……平時VR同AR就聽得多,甚至有唔少遊戲都有用到呢兩項技術,但係Mixed Reality (MR) 你又有冇聽過呢🌝?

Mixed Reality 算係一種混合咗VR同AR嘅技術。同VR一樣,MR現時都係要透過頭戴裝置去體驗嘅。透過呢個裝置,使用者可以同時睇到現實同虛擬嘅物品同場景👀。MR技術令虛擬嘅物件/角色出現喺我哋身處嘅現實場景裏面,然後我哋再同呢啲虛擬物件互動。簡單咁講,如果我哋將MR用落之前好hit嘅嗰個捉精靈game,我哋就唔再係碌電話mon去捉小精靈✖️,而係可以真係見到隻小精靈喺我哋面前彈彈下😗,然後我哋再親手去捉佢🖐️。

除咗用喺遊戲方面,其實MR仲可以應用喺生活其他嘅範疇,例如設計或者學習咁 (不過小編暫時最期待嘅都係想睇佢喺遊戲方面嘅應用啦 😜 )。唔講你未必知,其實依家已經有公司推出過支援MR嘅頭戴裝置啦,但基於價錢💲同支援不足😕等等嘅原因,MR暫時都仲未算係好普及。寫完呢篇介紹之後,小編已經好期待遲啲個技術發展得成熟啲,可以同大家一齊透過Mixed Reality去玩喇😆😆!

文:小編Mann