千錘百鍊而成嘅奧運獎牌

奧運比賽最近進行得如火如荼🔥,唔少人都係扮住工咁追睇比賽😏。見到香港嘅運動員最近分別攞到金牌同銀牌,相信大家都同小編一樣覺得非常開心同激動🤯!但話時話,其實奧運嘅獎牌,係咪真係用金、銀、銅整成嘅呢?定係抑或其實都係fake news,同我哋平時比賽攞到嘅獎牌差唔多呢🤨?

作為全球最大規模嘅運動比賽,國際奧林匹克委員會對獎牌係有一啲固定規定🗒️:每面獎牌直徑至少60毫米,厚3毫米,而金牌至少含有6克純金🪙 (btw 原來1912年之前嘅金牌都係由純金製作,1912年斯德哥爾摩奧運會嘅金牌重24克,但成塊都係純金製成😱)。但係除咗呢啲規定,其實獎牌嘅重量係無限制嘅,而且每屆嘅主辦國家仲可以自己係設計獎牌添😌。

今年嘅東京奧運公開招募獎牌設計方案,最後由 Junichi Kawanishi 提出嘅方案獲勝,決定獎牌100% 以回收電子廢料製作♻️,以回應近年全球對環保議題嘅關注同願景。於是東京奧委會由2017年4月開始,向公眾回收電子設備💻📱,收集所需嘅金屬,並且喺兩年嘅時間時,從收到嘅 78,895噸電子設備入面提取出 32公斤黃金、3,500公斤銀和 2,200公斤青銅。利用呢啲環保提取出嚟嘅金屬,製作大約800面獎牌🏅:

🥇金牌:喺純銀再鍍超過6克金而製成,約重556克 (東奧金牌原係夏季奧運史上最重)
🥈銀牌:由純銀製成,約重550克
🥉銅牌:95%銅+5%鋅組成嘅紅銅合金,約重450克

除咗環保元素之外,「明亮🌟」同「光彩🌈」都係今屆獎牌嘅設計主題。今屆嘅獎牌正面以渦狀條紋包圍五環標誌,令佢可以從唔同嘅角度聚集同反射光線💫,象徵今屆奧運會所有人所匯聚的嘅能量,同埋傳遞出奧運會上多樣性。呢啲設計嘅細節就係最反映到設計師心思嘅地方,為獎牌加上一層「勝利」以外嘅意義,令佢增色不少❣️。

小編寫完呢篇「零下二七三」之後,發現每一面獎牌背後都係有一大班人嘅努力同心思💪💗,每一面獎牌由構思開始,都係千錘百鍊而成⚒️。之後再加上運動員多年嘅刻苦訓練,搏盡咁去比賽,先至有企喺頒獎台頒獎嘅一幕。或者有好多事都唔容易😐,但就係因為我哋願意去付出,唔會輕言放棄,先可以將再困難嘅事變成現實✅。