你知道唔知道... 曱甴係活化石嚟㗎!🤪

耐唔耐都會聽到人講:「曱甴係活化石 🪨嚟㗎。」但對於呢種成日見、又遠古、又好得人驚嘅生物,你又知幾多呢👀?

考察返化石證據,估計原始蟑螂最先出現喺三億五千萬至二億八千萬年前嘅石炭紀。而即使經過咗幾億年咁耐,曱甴嘅外型其實都係變化不大嘅😗。但其實曱甴有咩咁勁,可以保持差唔多嘅型態,喺萬變嘅地球上生存咁多年呢?今次小編就同大家一齊了解下佢嘅智商同性格啦😆!

🔎 曱甴可能仲醒過我啲friend?

曱甴算係一種比較聰明嘅昆蟲 🪳 。一隻曱甴大概有1,000,000個腦細胞。雖然佢腦細胞嘅數量遠遠比人類有嘅100,000,000,000粒腦細胞少,但係佢哋對腦細胞嘅運用就比我哋靈活🧠。因為佢哋嘅腦細胞數量比起其他昆蟲多(例如「果蠅🪰」就只有250,000個腦細胞),再加上靈活腦細胞運用,曱甴喺記憶力同學習能力上都有令人意外嘅表現🤯。佢哋除咗可以記得視覺上嘅資料,搵到返屋企嘅路之外,仲可以分析佢哋之前嘅決定喺新環境入面仲係咪適用。

🔎 唔同性格嘅小強?

話說小編有一晚同啲朋友喺啲山邊嗰度行,路上遇見唔少曱甴喺路邊開party🥳。雖然心入面已經好L驚,但小編同朋友留意到一樣幾有趣嘅事--有啲曱甴會好進激咁衝過嚟我哋度🤬,而有另一啲就靜靜地留喺原地🙂,郁都唔郁。明明一樣係曱甴,佢哋遇到嘅一樣係我哋,但點解佢哋嘅行為會咁唔同嘅?唔通...佢哋都係有唔同嘅性格嘅?

研究顯示,原來曱甴真係有唔同性格嘅。科學家做過一個實驗 ,將16隻曱甴分組放落一個有強光照射嘅箱入面📦,再喺箱嘅中間放咗兩個俾佢哋避開強光嘅圓形遮蔭,之後喺每隻曱甴身上安裝追蹤器,監察佢哋嘅行動🕶️。

科學家發現雖然呢16隻曱甴都係喺相同嘅環境,而且大家都唔鍾意強光🚫,但佢哋進入圓形遮蔭嘅時間都唔一樣。有啲曱甴比較勇於嘗試😤,會比較快就進入圓形遮蔭,有啲曱甴就比較猶豫不決😕,會留喺強光範圍耐啲先再進入圓形遮蔭。如果組入面有性格比較願意嘗試嘅曱甴,組內其他曱甴都會俾佢鼓勵到💪,令成組進入圓形遮蔭嘅時間都變短。不過曱甴唔似螞蟻🐜呢啲有強社會性嘅生物,雖然佢哋都會俾唔同性格嘅曱甴影響,但佢哋始終係自己係做決定✅,自己考慮跟唔跟其他同伴,而唔係一定係跟住群體行。

睇完呢啲關於曱甴嘅資料之後,大家對呢種生物嘅感覺有冇改變咗少少呢🥲?小編自己睇完呢啲資料之後,覺得曱甴除咗恐怖之外,同時都係一種幾有趣嘅生物🤗,從來都諗過原來佢哋都有咁人性嘅一面。不過亦都可能因為佢哋有呢啲似人嘅智慧同性格,佢哋先可以喺呢個古怪多變嘅世界生存到咁耐🤔。

文: 小編Mann