Para Site 藝術空間 - 疫情期間都有展覽睇?

Para Site 藝術空間 @parasite.hk 展覽
程展緯 -「母體錯誤」(Glitch in the matrix), 曲淵澈 - 「機密錄:重寫」(Confidential Recodes: Overwrite)
展覽開放直至2021年2月21號,記得網上預約參觀展覽啊!詳細資料及開放時間可以上返Para Site藝術空間嘅官網查詢。

今次Para Site呢兩個展覽都好有驚喜,夾埋一齊睇好有連貫性!「母體錯誤」幽默回應現今社會狀況嘅反常同荒誕,探討香港僅餘嘅自由權利,反思我哋喺制度下嘅所有真實感受。而「機密錄:重寫」透過渲染力強嘅互動裝置,帶我哋進入一個俾人工智能極權統治嘅社會,展開觀眾對未來世界嘅無限想像。兩個展都比較小型,但裡面展品全部都值得慢慢細味感受,所以小編都睇咗成個鐘㗎!

一入門口見到個飲品販賣機喺展區外,以為只係普通辦公室設備,驟眼望咗吓就入咗展區,點知原來佢都係「母體錯誤」展品之一!裡面其實只有售賣同一款、同一容量嘅樽裝水,表達緊貌似有得揀,其實只係幻象。諗返起我一入門口見到得一式一樣嘅產品賣,見到啲反常事竟然冇第一時間意識到,實在慚愧呀。

另外「機密錄:重寫」展覽嘅展品雖然比「母體錯誤」少,但成個展嘅氣氛營造得好好。背景係講2047年嘅香港被人工智能統治,而人類喺極權主義下嘅抗爭只會換來面臨思想改造、強制提供自己記憶等恐怖後果。展區裡面啲超現實嘅霓虹燈光、全黑牆壁配上有「真血人類居民聚集處」同「第三極工業防禦部署」嘅香港地圖,感覺呢啲事距離自己好近,好壓抑。裡面令觀眾代入感最強嘅「黑房」,小編自己入去嘅時候都驚驚地,成功令呢個貌似科幻嘅背景設定更加真實,似係當下時代嘅影射。不過間「黑房」實際有啲咩睇,就等大家去發掘啦!

篇幅關係,唔可以將所有展覽內容逐個詳盡介紹,亦想賣下關子,鼓勵大家多支持獨立藝術機構,親自去睇展覽。總之就一句,兩個展覽都好值得睇呀!

以上內容都係小編個人主觀嘅分享,睇展覽最好都係自己親身去感受同體驗。每個人聚焦角度唔一樣,都會有唔同嘅睇法㗎。歡迎留言一齊討論交流啦!

文:小編tt