鬧市中嘅後花園

喺尖沙咀呢個人多車多嘅地方,原來隱藏住一個小小後花園,入面有住充滿古典巴洛克色彩嘅香港一級歷史建築---訊號塔🛕。

歷史由來📖:
呢座訊號塔係皇家香港天文台喺1907年起嘅,本來係用嚟向海員同市民準確報時🕗,之後喺1933年就停用咗,不過依家仍然會喺每日嘅朝早9-11點同下晝4-6點開放俾大家入去參觀影相😆。

前往方法🚶🏻‍♂️:
喺K11沿住緬甸臺行,經過垃圾站就會見到個花園入口,沿住斜路行5分鐘左右就會到達訊號塔~

個人建議🥳:
沿住花園入口嘅斜路行,見到分叉路嘅時候轉右,會見到白磚牆小屋,嗰到都幾適合打卡㗎~喺嗰到影完相就可以繼續向前行,上埋條樓梯就會見到訊號塔喺草叢同樹後🌳若隱若現。喺天然光嘅加持下,呢個位真係好靚🤩❤️。

訊號塔樓高3層,喺每層影出嚟嘅感覺同效果都有啲唔同🥰

最後離開訊號塔再上多條樓梯,就會見到對住維多利亞港嘅涼亭同長凳。

建議喺下晝4-6點呢段時間去,因為呢個時候有多啲天然光,影啲相都靚啲😚,另外影完仲可以坐喺訊號塔外嘅長凳,望住維港等日落☀️🌤⛅️🌥,過返個寫意嘅黃昏🌅~

溫馨提示👀:
沿路都有啲蚊,要記得噴蚊怕水
個訊號塔嘅開放時間係星期一至日嘅朝早9-11點同下晝4-6點,記得夾啱時間先去,唔好摸門釘啊~😖
訊號塔入面條樓梯有啲窄同斜,所以行嘅時候要小心啲🧐

📍訊號山花園
九龍尖沙咀緬甸臺

文:小編Cath