賽馬會藝方

大館呢個地方,對好多人嚟講都唔陌生 — 紅磚、前警署監獄、活化, 仲有最新嘅「Gucci Garden Archetypes」展覽。

但今日小編想講嘅,係大館入面,賽馬會藝方嘅呢部分。入面除咗有一間環境舒服、嘢又好食嘅Cafe,同出曬名嘅旋轉樓梯打卡位之外,仲有幾個唔同嘅展覽。

當中《墨城》呢個當代藝術展覽同《信任&迷惑》分別喺4月尾同5月頭開始就展出咗。小編唔係一個藝術人,難以用深入嘅角度同大家剖析各個作品。但用一個普通香港人嘅角度去睇,當中唔少嘅畫作都令小編有種難以言喻嘅無奈,例如《鍍影》- 林東鵬喺《港區國安法》通過嘅時候,用marker記錄象徵「清洗、刪除和消音,逐漸令整個城市模糊不清,比喻我們的未來也變幻不定」嘅雨水,但同時又留下「雨再大,還是在雨縫裡看到香港。」嘅寄寓。仲有《求存》- 用文字融入畫作,道出都市人為咗生活求存嘅嗰種鬥爭同無奈。

當然入面仲有好多唔同嘅藝術品,如果仲未去睇呢個展覽嘅,小編都推介大家,喺大館打卡放鬆之餘,慢下腳步去欣賞同感受一下。

文:小編Cath