想親親大自然🌿,又想有酒店級設備🛏? | 率先體驗長洲西園全新Glamping營帳 — 「霞賞」🌅🏕 (上集)

西園位於長洲嘅西南邊,主要提供露營區域、歷奇體驗等。不過有冇人好似小編咁,想親親大自然得嚟,又想有似返staycation感覺嘅選項 — Glamping營帳,例如今次小編有幸率先入住長洲西園最新推出嘅— 「霞賞」。

📌酒店級設備有幾齊備?

「霞賞」對住一大片草坡,景觀十分開揚。營帳係白色為主嘅透明圓拱形波波屋,裡面有冷氣同暖氣選擇,可自行調節適當溫度。仲有獨立廁所,唔洗再行過大草地先去到公共廁所同淋浴設施。營帳有張梳化床同雙人床,4個朋友一齊去都唔驚冇位瞓。最爽係有個連到藍芽喇叭嘅床頭櫃,音質唔算好高級,勝在開大多少少聲喺營外燒住烤都聽到音樂(不過附近都有其他營帳,記得唔好開太大聲影響到其他人呀)。

📌炭燒風味BBQ,Camp Fire,睇埋星星,餵吓羊仔

營外有私家燒烤爐,放食物喺燒烤網上面烤,有一番炭燒風味。爐隔離仲有洗手盆,無論洗手定洗蔬菜都勁方便!除咗燒烤爐之外,營外面仲有太陽傘枱、鞦韆、同篝火盤。小編去當晚都有啲涼風,最鍾意就係喺燒住木柴🪵嘅篝火附近坐,微微暖住個人食烤肉,同朋友圍住camp fire坐,氣氛又好,又放鬆。🥰🔥 多得呢度夠開揚,抬頭望上天仲有機會睇到星星添!✨🌌

第二日朝早起身,空氣果然比市區清新好多,本身想喺營外舖墊做吓瑜珈,點知發現好多羊仔喺我哋營帳外面食緊草!只要你好慢咁行動,大多數都唔會嚇走佢哋。見到有一家大細去小賣店買咗啲乾草餵羊,成班羊仔唔驚你,仲勁猴擒衝去你到搶草食添!呢度會包餐簡單早餐,食食吓有隻成年羊衝嚟我哋枱到搶食麵包,我驚過佢呀,好彩即刻有職員出嚟趕返佢去草地。成個體驗有少少似去咗奈良餵啲會衝嚟搶嘢食嘅鹿,加上成個西營入住人數唔多,地方又寬敞,有啲似去咗海外嘅小眾渡假村咁。🏖

呢次兩日一夜小假期實在太多好玩嘢介紹,下集將會分享埋啲小細節,包括燒烤食物邊到買,西園歷奇活動、出返長洲碼頭附近去咗邊等。Follow定我哋WannaPlay page就唔怕錯過啦!