古早味台灣

週末喺灣仔行吓街,行行吓見到有兩個一紅一綠,歪咗嘅郵筒📮。仔細睇吓,發現呢兩個唔係香港郵筒嚟㗎,而係台北之前2015年俾颱風蘇迪勒吹歪嘅「小紅」「小綠」郵筒🔴🟢。

經過呢兩個郵筒,發現餐廳地下嗰層嘅佈置好似啲好舊式嘅士多咁📻。原來由12/8至31/12期間,台灣觀光協會聯合台式餐廳「尚青商號」,一齊搞咗個《台灣懷舊柑仔店主題展》📺。

台語嘅「柑仔店」又即係我哋講嘅士多,今次嘅展覽完美還原當年60年代嘅台灣「柑仔店」,有好多細緻嘅地方都有呈現到出嚟呢📸!喺呢個「柑仔店」嘅擺設前打卡影相,post 上網嚟個偽旅行都似乎係一個幾唔錯嘅選擇😌。

除咗打卡,呢度啲食物水準都有返咁上下。小編們今次嗌咗個三杯雞飯🐓,同埋半筋半腩牛肉麵🐂。個飯嘅誠意十足,除咗係用個煲仔裝住,底下仲有個爐用細火暖住啲餸🔥,傾住計食都唔怕啲餸凍晒啦。

至於個牛肉麵,除咗個麵本身,佢仲跟咗啲幾得意嘅配菜 (有油炸鬼?),小編唔太知要點配嚟食,所以就放咗佢落三杯雞個煲度🌚。知道點配嚟食先最夾嘅你哋,歡迎喺下面留言話返俾我知啦😉~

溫馨提示📝:
🔸呢間餐廳都幾受歡迎,但佢係不設攞飛,要排隊輪住入座㗎,所以如果想嚟食嘅話,可能要預多少少時間攞位,或者唔好揀peak hour 嘅時間嚟啦!

🔸紅茶底嘅奶茶好受歡迎,小編嗰日去到已經賣晒,想飲都冇,所以想飲就要趁早喇~

📍尚青商號
灣仔蘭杜街4號地下文熙大廈

文:小編Mann